Samkvæmt lögum um ársreikninga nr. 144/1994, með síðari breytingum, ber flest öllum fyrirtækjum að skila ársreikningum sínum til opinberrar birtingar. Nánar er greint frá því hvaða félög eru skilaskyld í VIII. kafla laganna, 69. – 78. gr., sjá hér að neðan. Reikningum skal skilað til Ríkisskattstjóra.
Ársreikningi skal skilað eigi síðar en einum mánuði eftir samþykkt hans en þó eigi síðar en átta mánuðum eftir lok reikningsárs en félög, sem hafa hlutabréf sín eða skuldabréf skráð á opinberu verðbréfaþingi, skulu þó senda ársreikninga þegar í stað eftir samþykkt þeirra en þó eigi síðar en sex mánuðum eftir lok reikningsárs. Skilaskylda á samstæðureikningi hvílir einnig hjá móðurfélagi samstæðu. Nýjasta reglugerðin um skil og birtingu ársreikninga er nr. 319/2003.
Rökin fyrir skilaskyldu ársreikninga eru þau, að um nokkurs konar gagngjald sé að ræða fyrir hagræðið af því að fá að stunda atvinnurekstur með takmarkaðri ábyrgð. Aðrir eigi á móti þessu hagræði rétt á að fylgjast með rekstrinum.
Eins og fram hefur komið er aðalreglan sú, að öll félög skuli skila ársreikningi, eða eftir atvikum samstæðureikningi, eins og hann var samþykktur af hluthafafundi. Þó er félagi, sem tvö ár í röð fer ekki fram úr tvennum af eftirfarandi stærðarmörkum á reikningsskiladegi, heimilt að senda ársreikningaskrá samandregna útgáfu af rekstrarreikningi, efnahagsreikningi og skýringum sbr. reglugerð nr. 694/1996, um framsetningu ársreikninga í samandregnu formi:
1. eignir nema 230 milljónum króna
2. rekstrartekjur nema 460 milljónum króna
3. fjöldi ársverka á reikningsári nemur a.m.k. 50
Þegar sérstakar samkeppnisaðstæður mæla með því geta félög sem fara tvö reikningsár í röð á reikningsskiladegi ekki fram úr tvennum af eftirfarandi stærðarmörkum, og að fengnu samþykki ársreikningaskrár, lagt fram til birtingar samandreginn rekstrarreikning:
1. eignir nema 575 milljónum króna
2. rekstrartekjur nema 1.150 milljónum króna
3. fjöldi ársverka á reikningsári er a.m.k. 250
Félög sem fara fram úr þessum mörkum skulu ávallt skila fullum rekstrarreikningi, þ.e. ekki samandregnum.
Um efni samandreginna ársreikninga er fjallað í reglugerð nr. 694/1996. Helsta frávikið frá hefðbundnum ársreikningi er að ekki þarf að greina veltu, eða hagnað fyrir afskriftir.
Á vef Ríkisskattstjóra er hægt að kanna hvort tiltekið félag er skilaskylt og þá hvort og hvenær ársreikningi hefur verið skilað.